HEZKIDETZA LANTZEN

Hezkuntza hezkidetzaile oso baterantz

1997ko uztailean "Emakumeentzako ekintza positiboaren Udal Plana" abian jartzea onartu zuen Udalbatzarrak eta plan honetan Udalaren  Berdintasun zein Hezkuntza sailek , bien artean,  hezkuntza komunitatearekin hezkidetza programazioa garatzea  lehentasunezkotzat jo zuten.

Izan ere, 1997.urtez geroztik, arian arian,  Arrasateko HH eta LMHko  ikastetxeek eta DBHko hainbat ikastetxek  hezkidetza proiektua landu zuten 2009-2010 ikasturtea bukatu artean.Ikastetxeek udaleko bi sail horiekin  Arrasateko Hezkidetza Mahaia osatu zuten  eta  programazioa hiru arlotan landu zen.

a) Eskoletako irakasleentzako hezkidetza-prestakuntza ematea. Hasierako gaikuntza sartzen ziren ikastetxeentzat eta gero prestakuntza iraunkorra hurrengo ikasturteetan. Prestakuntza teorikoa emateko hezkidetzan adituak ziren aholkulari batzuen bidez baliatu zen Udala  eta proiektuaren garapena aholkularien, Udaleko teknikarien eta ikastetxeen partaiden ekarpenekin eraman zen.

b) Ikasgeletan ikasleekin hezkidetza jarduerak landu eta abian jartzea. Irakasleek teoria jaso ahala,  hezkidetza jarduerak ikastetxeeen ikasgeletan martxan jarri ziren eta jarduera hauen garapena hezkidetza aholkulariek jarraitzen zuten tutoritza zerbitzuaren bidez.

c) Gurasoak hezkidetzan heztea. Eskoletan lantzen ari ziren hezkidetzari buruzko aktibitateak   haiei helaraztea, hezkidetza boletinak landu eta argitaratu ziren,  boletin horiek gurasoek etxean jasotzen zituzten beraien seme alabekin batera lantzearren eta  LMH zein DBHko gurasoei zuzenduta zeuden.

Proiektu horren helburua hezkidetza jarduera, herrian, hezkuntza komunitatearen eragile guztiekin lantzea zen, hau da, irakasleekin, ikasleekin, ikasleekin zein gurasoekin, eta ikastetxe bakoitzak bere eskolako hezkuntza proiektuan hezkidetza programazioa txertatzea.

2006.urtean, proiektu honen bilakaeraren  eta argitaratutako boletinen berri emateko “Arrasaten Hezkidetza lantzen: Hezkuntza hezkidetzaile oso baterantz” izeneko liburua eta CDa argitaratu zituen Arrasateko udaleko Berdintasun eta Hezkuntza sailek, Urtxintxa eskola izanik, material horren egilea.

2006.urtetik 2009.urtera arte, hezkidetza boletinak lantzen jarraitzen zuten bi sailek ikastetxeekin eta  18 ale argitaratu  ziren ( bertan dituzu zikloka eta gaika sailkatuta, lantzeko) eta bi boletín digital parte hartzaile ikastetxeentzat.

Hamalau urtez, hezkidetza lantzen aritutakoan, 2009-2010 ikasturtearen bukaeran, ikastetxeekin adostuta, ikastetxeen eskolako hezkuntza proiektuetan jarduera txertatuta zegoelakoan, jarduera lantzeari utzi zion Hezkidetza mahaiak, atea zabalik utziz, geroan, berriro, gaia lantzeko esperoan.

2007-2008 ikasturtean Hezkidetza mahaiak abiaturiko hezkuntza arloan genero indarkeriari aurre egiteko plana, “Eraldatzen” izenekoa, egun, jarraitzen dute lantzen ikastetxeek.

Hezkuntza komunitatearentzako eta herritarrentzako material didaktiko interesgarria delakoan, sexu berdintasunerako hezkuntza lantzeko, argitaraturiko material hori ikusgai eta erabilgarri duzu 2 apartatu hauetan:

2006an argitaratutako CDa.

2006 - 2009 arteko boletinak.