Udal bibliotekaren xedea eta zerbitzuak.

Xedea

Arrasateko Udal Biblioteka doako zerbitzu publikoa da, adin guztietako herritarrei zuzendua.

Euskadiko Irakurketa Publikoko Sarean parte hartzen du, eta hauek dira bere helburu nagusiak:

Informazioa eskuratzeko bitartekoak jartzea.
Bizialdi osoko ikaskuntzan laguntzea.
Irakurketa sustatzea, bereziki haurtzaroan, herriko ikastetxeekin lankidetzan.
Kultura aisialdia eskaintzea.
Herriko informazioa zein kultura produkzioa bildu, gorde eta zabaltzea, tokiko historia eskuragarria izateko.
Espazio libre eta babestu bat eskaintzea, pertsonen artean komunikazioa eta elkarbizitza bultzatzeko.
Nazio Batuen Erakundearen Garapen Iraunkorrerako 2030 Agendaren helburuak lortzen laguntzea.

Bibliotekan bertan kontsultatu daitezke bildumako dokumentuak: gai askotako liburuak eta literatura, aldizkariak, egunkariak, musika eta pelikulak.
Tokiko bilduma (bakarrik Kulturaten): atal honetan aurkituko dituzu Arrasateren gaineko bibliografia eta kultur produkzioa.

Laguntza eskaintzen da dokumentuak lokalizatzeko, informazioa bilatzeko eta zerbitzuak erabiltzeko.
Web orrian aurkituko dituzu albisteak, agenda, nobedadeak, online tramiteak eta zerbitzuen inguruko informazioa: www.arrasate.eus/biblioteka
Online katalogoan kontsultatu daiteke Euskadiko sareko biblioteka denen bilduma: www.euskadi.net/katalogobateratua

Behar duzuna gure bilduman ez badago, eskuratzea proposatu dezakezu. Bibliotekak baloratuko du erostea edo beste biblioteka batetik maileguan ekartzea.
Liburutegien arteko mailegua: guk ez daukaguna beste biblioteka batzuetatik ekarri dezakegu, eta era berean, gure dokumentuak beste batzuei uzten dizkiegu, sareko bibliotekekin elkarlanean.

Dokumentu gehienak maileguan eraman daitezke.
Liburu elektronikoak eta online pelikulak maileguan hartu ditzakezu eLiburutegian (http://www.euskadi.net/eliburutegia) eta eFilmen: (https://eliburutegia.efilm.info)

Ordenagailuak eta wifia daude modu autonomoan erabiltzeko. Aukera dago inprimatu, eskaneatu (Kulturaten bakarrik) eta fotokopiatzeko (Kulturaten bakarrik).
KZgunea (Kulturaten bakarrik): teknologia berrien gaineko ikastaroak eskaintzen dira, eta baita tutoretza pertsonalizatuak ere.

Jarduera antolatzen ditugu irakurketa eta bibliotekaren erabilera sustatzeko; esaterako, literatura solasaldiak, ipuin kontaketak eta gomendioen gidak.

Ikasleentzat zein bestelako taldeentzat bisitak eskaintzen ditugu biblioteka ezagutu eta zerbitzuen berri emateko.