Kontsumo arduratsua. Udalaren proiektuak.

Jarduera ekonomiko jasangarriak bultzatzeko proiektuak

Udal Azoka Biziberritzeko proiektua

Herritarrekin, saltokietako oraingo adjudikaziodunekin, baserritarrekin eta gizarte eragileekin prozesu ireki eta parte-hartzailea burutu dugu. Denon artean diseinatu dugu Arrasatearron bizi kalitatean zuzenean eragingo duen azoka-gune berria, herritarren premiei erantzungo diena:

Herriko merkataritza indartzea,
Elikadura osasuntsua bermatzea,
Hurbileko nekazaritza sustatzea.
Arrasatearron arteko sare eta harremanak indartzea.
Kontsumo ohitura iraunkorrei eta solidarioei bide ematea.

Gipuzkoako 3. Ekozenterra.

2014ko maiatzean estreinatu genuen 2.610m2-ko Ekozenterra. Emaus Fundazioarekin 2008an abiatutako egitasmoa da, eta helburu bikoitza du:

Material eta objektuen berrerabilpena sustatzea.
Bazterkeria arriskuan dauden pertsonak laneratzeko errekurtso bat eratzea. Gizarteratze Enpresa izaerako lantokia da.

Arrasate Bidezko Merkataritza Hiria izendatzeko lehenengo urratsa eman dugu. Udaleko alderdi guztiok adierazpen instituzionala onartu dugu eta herriko eragileekin (Emaus, Harreman, Bagara, Ibaiarte, Udala) Bidezko Merkataritza sustatzeko mahaia sortu da.

Herriko nekazaritza, komertzioa eta enpresak sustatuz

Lehenengo sektorea indartzeko ekimenak

Baserritarren azoka antolatzen dugu hilero, nekazaritza eta baserriko produktuen promozioa sustatzeko.
Kurtzetxiki mendian, Larragainen, Udalaren 10 hektareako lursail bat errekuperatu dugu, lehen sektorea bultzatzeko, besteak beste.
Urtean zehar bertako produktuak sustatzeko kanpainak egiten ditugu. Moxal hazkuntza eta moxal okelaren kontsumoa sustatzen gabiltza aurten bereziki.

Herriko merkataritzari elkarrekin bultza

Urtero Ibai-Arte Merkatari elkartearekin hitzarmena sinatzen dugu, eta laguntza ekonomiko bidez merkataritza suspertzeko hainbat ekintza egiten dituzte urtean zehar: Beherapenen azokak; neguko eta udako Merkemerkauak; Merkataritza Berdearen Astea; Gabonetako Kanpaina; Ibai-Arte Txartela; Ibaiarte web orria; Dendari.com; Udaberriko festa...

Herriko enpresa berrientzako laguntza programa

2002an abiatu zen eta gehien bat merkataritzan eragiten du programa honek. Laguntza jasotzen duten gehienak enpresa txikiak dira, 2 langilerekin. Azkenengo bost urtetan 45 lanpostu finko sortu dira.

Murriztu,berrerabili, birziklatu

Hondakinen kudeaketan konpromiso bat lortu dugu gizarte eragileen eta alderdi politikoen artean, ez bakarrik gaikako bilketa sistema aukeratzean, etorkizunean elkarrekin lan egiteko ere bai, Arrasaten sistema iraunkor bat lortze aldera. Hondakinen Mahaiak urte betetik gora darama horretarako lanean.

Argi dugu ohiturak aldatu beharrean gaudela: hondakin gutxiago sortzen, berrerabiltzen eta birziklatzen ikasi behar dugu. Denon esku dago ondo egitea eta horretarako bitarteko guztiak ari gara jartzen: Baliabide teknikoak, informazioa, kontzientziazioa eta formazioa.

Mugikortasuna hobetuz

Herrian eredu iraunkorrago eta seguruago bat bultzatzen ari gara. Arrasateko mugikortasunaren planaren barruan lehentasuna dugu oinezkoei aukerak eman eta herri barruko bizikleta bide sarea osotzea.

Zentzu horretan, besteak beste: alde zaharra oinezkoentzat bihurtu dugu, bizikleta bide sarea osotzen ari gara herri barruan, TAO ari gara apurka ezartzen eta, era berean, garraio publikoa sustatzen.