Arrasate etorkizun berdeago baterantz: plana bigarren fasean sartu da proposamen zehatzekin

Arrasateko Udalak martxoan abiatutako ‘Azpiegitura berdea, klima eta energiaren plana’ garatzeko parte-hartze prozesua bigarren fasera iritsi da. Lehenengoan herritarren diagnostikoa jaso zen auzoz auzoko saioen bidez, eta orain jarduketa-proposamen zehatzak definitzen hasi da Udala, sektore eta kolektibo ezberdinen ikuspegiak jasoz.

Parte hartze zabala eta askotarikoa

Bigarren fase honetan, honako eragileekin egin dira parte-hartze saioak:

• Haurrak eta gazteak:
  
  • Haurren Kontseilua: maiatzaren 7an (Txatxilupurdiren laguntzarekin).
  • Gazteak: maiatzaren 7an institutu publikoan, eta maiatzaren 14an Arizmendi ikastolan.
• Adinekoak: Maiatzaren 7an eta 14an gerturatu dira udal ordezkariak hiru jubilatuen etxeetara.
• Udal teknikari eta langileak: Maiatzaren 14an.
• Hirigintza Aholku Kontseilua: Maiatzaren 14an.
• Kale galdeketak: Maiatza osoan zehar kalean egin diren galdetegiak, behar diren auzo, adin tarte edo generoekin zuzendutako presentzia aktiboa bermatuz.

Parte-hartze saio hauetan, sektore bakoitzak bere ikuspegitik egin du ekarpena: hezkuntza, gazteria, hirigintza, adinekoen zaintza eta udal kudeaketa. Helburua da ikuspegi horiek guztiak bateratzea Arrasatek behar duen azpiegitura berde, klima eta energia plan integrala definitzeko.

Saio irekia herritar guztientzat: maiatzak 27

Bigarren faseko unerik esanguratsuena izango da maiatzaren 27an egingo den parte-hartze saio irekia. Saioa 18:30ean izango da, Kulturateko Loramendi gelan, eta edozein herritarrek parte hartu ahal izango du.
Udalak herritar guztiei dei egiten die saio honetan parte hartzera: “Orain proposamenak egiteko garaia da, eta ahalik eta iritzi anitzena behar dugu. Hiriaren etorkizun berdea elkarrekin eraiki behar dugu,” adierazi du Garazi Etxeberria zinegotziak.

Ekintza plana: plana betetzeko ezinbestekoa

Hirugarren eta azken fasean, jasotako proposamenak aztertu eta lehentasunak ezarriko dira ekintza-plan eraginkor eta zehatza osatzeko. Planaren helburua da Arrasatek klima aldaketaren aurrean erresilientzia irabaztea eta hiri jasangarriago baterantz urrats sendoak ematea.