TAOrik gabeko Erguingo kale bakarraren arazoari amaiera emango dio Udalak, auzokideek hala eskatuta

2025/10/21
Card image cap
Udalpe eta Itxaropena kaleen errepidea da auzoan TAOrik ez duen gune bakarra, eta auzotarren eskariz sartuko du Udalak ordenantzan. Datorren astelehenetik aurrera jarriko da martxan, eta dagoeneko burutzen ari dira seinale bertikalen kokapena eta lurreko aparkalekuen marrazteak.

Datorren astelehenetik aurrera jarriko da martxan Udalpe eta Itxaropena kaleak batzen dituen errepide luzean TAO sistema. Hala eskatu dute bizilagunek, eta, aurrerantzean, auzotarrentzako aparkaleku bilakatuko dira. 

Arazoari konponbide emateko auzotarren eskaria 

2022 urtean sartu zen indarrean TAO sistema Erguin auzoan, Udalpe eta Itxaropena kaleetan izan ezik. “TAO sistematik kanpo geratze horrek, arazoak sortu dizkie kale horietako bizilagunei azken urte hauetan, aparkatzeko zailtasunekin eta trafiko fluxua handituz” azaldu du Maider Morras alkateak. 

“Udalpe eta Itxaropena kaleetako bizilagunek arazoari konponbide bat emateko eskaera egin ziguten, kalean TAO sistema ezartzeko eskatuaz. Ordenantza errebisatu ostean, eta bideragarria zela ikusita, hala egin dugu. Izan ere, 2022an ez zen ondo neurtu Udalpe eta Itxaropena kaleak TAOtik kanpo uztearen eragin negatiboa, eta hori konpontzea lehentasunezkoa izan da auzotarrentzat eta Udalarentzat”.

Urriaren 27tik aurrera martxan

Ondorioz, datorren urriaren 27tik aurrera, martxan jarriko da TAO sistema Udalpe eta Itxaropena kaleetan. Modu honetan, salbuespen egoerarekin amaitzea lortuko da, eta Erguin auzoak sistema berdina izango du indarrean. 

Udalpe eta Itxaropena kaleak bizilagunen aparkalekuak izatera pasako dira, Erguin osoko auzotarrentzat, eta dagoeneko bi kale horietako bizilagunek eskatu dezakete egoiliarren txartela TAOren bulegoan.

Ordenantza berrikustea

Hainbat ordenantza berrikusiko dira datozen urteetan, eta horien artean dago TAOrena. “Oraintxe bertan terrazen ordenantzaren azken prozesuan gaude. Prozesua bukatutakoan (abendurako aurreikusita dago), TAOren berrikuspenari ekingo diogu. Prozesua 2026. urtearen hasieran hastea espero dugu” adierazi du alkateak. Horretarako auzotarren parte-hartzea sustatuko da, auzokideen eskaerak entzun eta sistema sinpleago bat bilatzeko. Erabiltzaileek ere beren iritziak emateko aukera izango dute.