Arrasatek emakumezkoen eskuzko bi final hartuko ditu 2026ko EHko Ezker Paretako Kluben arteko txapelketan

2026/03/03
Card image cap
Asteburu honetan jokatuko dira 2026ko Euskal Herriko Ezker Paretako Kluben arteko Txapelketako finalak, kluben egutegiko hitzordu garrantzitsuenetako bat. Testuinguru horretan, Arrasatek jardunaldi berezia hartuko du, izan ere, Uarkape pilotalekuan Emakumezkoen Eskuzko bi final antolatuko dira martxoaren 7an (larunbata), 10:30etik aurrera.

Data hau aukeratzeak, gainera, jardunaldia martxoaren 8aren inguruko testuinguruarekin lotzea ahalbidetzen du, emakumeen kirolaren ikusgarritasuna eta protagonismoa indartuz gure inguruan tradizio eta sustrai handia duen modalitate batean.

Kirol arloan, bi final hauek jokatuko dira: Alde Zaharra vs LAPKE (Emakumezkoen Eskuz – gazte maila) eta Lea Ibarra A vs Lea Ibarra B (Emakumezkoen Eskuz – nagusiak / Ohorezko Maila). Jardunaldiak erreferentziazko klubak eta pilotariak bilduko ditu, eta 2026ko edizioko tituluak erabakiko dira dagokion maila bakoitzean.

Ezker Paretako Kluben arteko Txapelketaren helburua da kluben arteko lehiaketa ofiziala bultzatzea, kirol-sarea indartzea eta pilotariei lehiaketa-ibilbide egonkor eta antolatua eskaintzea. Arrasateko finalak konpromiso horren barruan kokatzen dira, eta aukera paregabea izango dira maila goreneko partidak bertatik bertara gozatzeko, aldi berean emakumezkoen pilotaren garapenean eta aitortzan aurrera egiten jarraitzeko.