‘Bizitzak erdigunean’ ipiniz antolatu da Martxoaren 8ko jarduera bilduma

9 ekintza ezberdinez antolatu da programazioa: erakusketa, ikuskizuna, proiekzioak, azoka, aurkezpenak…

‘Bizitzak erdigunean’. Hori da datorren martxoaren 8aren bueltan, Emakumeen Nazioarteko Eguna, Arrasateko Emakume Txokoak herriko eragileekin elkarlanean antolatu duen ekintza bildumaren leloa.

Kartela June Baonza Pagaldaik burutu du eta ‘M8 besarkada’ izenburupean. XXII. Martxoak 8ko Kartel Lehiaketaren bitartez aukeratua izan da.

Udalak herritarrak Martxoaren 8aren bueltan antolatu diren ekintza andanatan parte hartzera gonbidatu ditu. "Bizitzen erdigunean jarri nahi dugu aurtengoan fokoa. Eskubide berdintasunak pertsonen garapena dakar, eta hori da demokraziaren oinarrietako bat. Martxoaren 8ak ospakizunetarako balio du, orain arteko lorpenak nabarmentzeko, baina, haratago, aldarrikapena eta konpromiso eguna da Emakumeen Nazioarteko Egunekoa. Guztiona, gizon eta emakume, emakumearen papera oraindik ez baita esparru guztietan errekonozitzen".

Martxoko zortzigarren egunetik harago, ordea, Udalak emakumeen eskubideak urteko 365 egunetan aldarrikatu beharraz ohartarazi du: "Egun guztiak izan daitezela emakumeen eskubideen aldekoak, eta martxoaren 8ko ospakizun eguna soilik bilaka dadila, emakume eta gizonen arteko berdintasun erreala lortu izanaren seinale izango baita. Horretan dihardugu lanean Arrasateko Udalean Emakumeen Txokoarekin eta herriko eragileekin elkarlanean, herriko politika publikoan zehar-lerro oso garrantzitsua baita berdintasuna; herri parekidea dugu jomuga”.  

Honakoa da jarduera bilduma.

MARTXOAK 8KO KARTELEN ERAKUSKETA

Martxoaren 4tik 18ra,  Emakume Txokoan  Astelehenetik eguenera:  10:30-13:30 eta 15:00-18:00 Egubakoitzean: 10:00-14:00

“ERROA ETA GEROA” DOKUMENTALAREN EMANALDIA ETA SOLASALDIA

Aurkezpena:  Ane Gorosabel Monje eta Maribi Ugarteburu Martxoaren 3an martitzenean 19:00etan, Kulturaten,  Areto Nagusian. Euskaraz.

SAGRAREN POEMAK

Martxoaren 4an, eguaztenean 19:00etan, Kulturaten, Areto Nagusian Antolatzaileak: Sagraren Lagunak

MARTXOAK 8KO  EMAKUME ARTISAU ETA BASERRITARREN AZOKA

Martxoaren 7an, zapatuan Seber Altube plazan 10:00etatik 14:00etara

MARTXOAK 8

12:30ean Manifa Seberotik 14:30ean Bazkari Feminista  Seberon edo Azokan 16:30ean Mikro-irekia  Seberon edo Azokan

ERRADIKALAK GINEN IKUSKIZUNA

Ane Labaka Mayoz (bertsolaria)  eta Beatriz Egizabal (antzerkigilea) Martxoaren 7an, zapatuan 19:00etan, Kulturaten,  Areto Nagusian. Euskaraz

“NIK SINISTEN DIZUT” LIBURUAREN AURKEZPENA

Samara Velte,  liburuaren egilearen eskutik Martxoaren 17an, martitzenean 18:30ean, Kulturaten,  Areto Nagusian. Euskaraz

“ARGI-IZPIAK TXARRANTXEN ARTEAN. 14 BEGIRADA KARTZELA FEMINISMOTIK BIRPENTSATZEKO” LIBURUAREN AURKEZPENA

Maria Ruiz Torruelo , Oihana Etxebarrieta Legard, Laura Vera Jimenez Martxoaren 18an, eguaztenean 19:00etan, Kulturaten.  Antolatzailea: Mugimendu Feminista, Euskaraz.

ZINEGOAK HEDAPENA

Film laburren emanaldia Martxoaren 26an, eguenean 19:00etan, Kulturateko Areto Nagusian Euskaraz eta gaztelaniaz.

 

June Baonzaren ‘M8 besarkada’ irudi

Kartela June Baonza Pagaldaik burutu du eta ‘M8 besarkada’ izenburupean. Esan bezala, XXII. Martxoak 8ko Kartel Lehiaketaren bitartez aukeratua izan da.

Guztira 12 lan aurkeztu dira eta antolatzaileen esanetan, “ikuspegi propioa eta kalitatezkoa erakutsi dute guztiek”.

June Baonzaren lana izango da aurtengo Martxoak 8ko kartelaren irudia eta herriko elkarte eta eragile feministekin, baita egitaraua iragarriko duen esku orrikoa ere.

Kartelen aukeraketan, M8 Plataformaren deialdiari erantzunez, Emakume Txokora hurbildu diren emakumeek parte hartu dute.

XXII. Kartel lehiaketara aurkeztutako 12 lanak ikusteko aukera egongo da, martxoaren 4etik 18ra, Emakume Txokoan egingo den erakusketan. Egitarauan dago hitzordua zehaztuta.