Arrasateko 900 bizilagun inguruk, 6.373 punturekin, 6 proiektu lehenetsi dituzte 2021-2022ko partaidetzako aurrekontuetan

Arrasateko Udalaren 2021eko eta 2022ko partaidetzako aurrekontuen prozesua amaitu da. 849 arrasatearrek parte hartu dute azken fase erabakitzailean eta 6.373 puntu eman dituzte, 6 proiektu lehenetsiz. Horietatik 52 puntu baliogabeak izan dira.

Udalak 500.000 euro bideratuko ditu hautatutako proiektuetara. Arrasatearrek 243 proposamen aurkeztu zituzten lehen fasean; herritar boluntario eta udal teknikari talde batek 16 proiektu aukeratu zituen, kontuan hartuta bideragarritasuna eta oinarrietan ezarritako baldintzak betetzea; horietatik, arrasatearrek, beren puntuen bidez, 6 lehenetsi dituzte.

Hona hemen zer proiektu hautatu diren, jasotako botoen arabera: Zigorrolako balkoia aisialdirako egokitzea; Santa Barbarako parkea hobetzea: bankuak eta paperontziak eraberritzea; Pumptrack: bizikleta eta patineteentzako zirkuitua (Azterketarako lekua); Aramaio errekaren ondoko bidegorria argiztatzea (Alecopetik Markuletera); bizikletentzako aparkaleku seguruak; eta Gipuzkoa etorbidea argiztatzea eta egokitzea.

Parte-hartzea % 17 igo da

Parte hartzea, 2019ko azken edizioaren aldean, % 17 igo da. Arrasaten erroldatuta dauden 10 urtetik gorako arrasatear guztiek bozkatu ahal izan dute.

Udalak bide bi jarri zituen botoa emateko: online, www.arrasate.eus webgunean, eta aurrez aurre BAZen, Kulturaten, Etxaluzen eta kiroldegian. Gehiago bozkatu da online (635 pertsona), aurrez aurreko modalitatearen aldean (214). Aurrez aurreko botoak honela banatu dira: 112 Kulturaten, 57 BAZen, 43 kiroldegian eta 2 Etxaluzen. 449 boto emaile emakumeak izan dira eta 400 gizonak.

Adin tarteari dagokionez, 30 eta 49 urte bitartekoek eman dute boto gehien (388, % 46), eta, ondoren, 50 eta 69 urte bitartekoek (249 pertsona, % 29).

Hurrengo urratsa: proiektuak idaztea

Orain, 2021-22 partaidetzako aurrekontuetako proiektuak aukeratuta, udala hasiko da horiek gauzatzeko behar diren proiektuak idazten. Arrasateko Udalaren asmoa da behar diren lan eta obra guztiak aurten bertan hastea.