Arrasateko irisgarritasuna hobetzeko 151.670 euro inbertitu dira

Arrasate herri atseginagoa, erosoagoa eta bereziki irisgarriagoa eraikitze aldera, Udalak arreta berezia jarri du herriko kaleen hobekuntzan.

Ildo horretan, 2019an zehar asfaltatze lan ugari egin ditu herriko kale ezberdinetan, hala nola Eroski irteeran, Etxagibel notario kalean, Otaloran, Garibai-Biteri-ko bidegurutzean, Araba etorbidean, Elkano 36-40 zenbakien artean, Elkano 21-25 zenbakien atzealdean, Gipuzkoa etorbidea 35 eta 37-41 zenbakietan eta San Francisco JL Iñarran.

Horiek horrela, asfaltatze lan horien bitartez, guztira 9583m2ko azalera berritu eta hobetu du Udalak eremu horiek irisgarriagoak, atseginagoak eta oinezkoentzat seguruagoak egiteko. Yarritu enpresa izan da lan horiek aurrera eramatearen arduradun eta guztira 151.670,07€ bideratu ditu lanen exekuziorako.

Lanen helburua da Arrasate zein arrasatearren mugikortasuna eta irisgarritasuna hobetzea, baita, horri lotuta, haien ongizatea ere.