Arrasateko Udalak belaunaldien arteko harremanak sustatuko ditu proiektu berri baten bidez

Arrasateko Udal Biblioteka, Udal Hezkuntza eta Gazteria Sailekin eta Bizipoz kooperatibarekin elkarlanean, “Belaunaldien arteko harremanak” izeneko proiektua garatzen ari da ikasturte honetan zehar. Ekimen honen helburu nagusia adin-aurreiritzien inguruko jarrera aldaketa sustatzea eta belaunaldi ezberdinen arteko loturak estutzea da.

Proiektuaren bidez, pertsona nagusien bizi-esperientziak eta haurren naturaltasuna eta ikuspegi irekia uztartu nahi dira, adin desberdinetako pertsonak uste baino antzekoagoak garela erakusteko. Topaketa hauetan herriko hainbat taldek hartuko dute parte:

• Ikasleak: Arrasate Herri Eskolako eta Arizmendi Ikastolako Lehen Hezkuntzako 3. mailako haurrak.
• Pertsona nagusiak: Atartea, Iturbide Egoitza, Aita Menni eta Sasoibideko partaideak.

Egitaraua eta saioak

Topaketak apirilaren 24an hasiko dira Kulturateko haur eta gazte bibliotekan. Proiektuari amaiera emateko, maiatzaren 7an saio berezi bat egingo da Areto Nagusian. Azken topaketa honetan, ikasleek eta nagusiek berriz ere bat egingo dute bizi izandako esperientziak eta prozesuan zehar ikasitako guztia elkarrekin partekatzeko.

Informazio gehiago nahi izanez gero, interesdunek Udal Bibliotekara edo Bizipoz elkartera jo dezakete.