Arrasateko Udalak udako turismo eskaintza aurkeztu du: natura, kultura eta festa uztartzeko proposamenak

Arrasateko Udala prest dago herritarrak zein bisitariak erakartzeko uda honetan, uztailaren eta irailaren artean eskaintzen duen turismo-programa oparoarekin. Aurten ere, kultura, natura eta herri tradizioak uztartzen dituen egitaraua aurkeztu du, helburu argi batekin: gertuko turismoa sustatzea eta Arrasateko ondarea balioan jartzea.

Deskargatu hemen turismo eskaintza osoa

Mendi ibilaldi gidatuak: doan eta familia giroan

Uda osoan zehar, zazpi ibilaldi gidatu antolatu dira, naturaz eta historiaren aztarnez jositako ibilbideetan barna. Parte hartzea doakoa da, eta ibilaldiak egokiak dira lagunartean edo familian egiteko.

Ibilbide aipagarrienen artean daude:

• PR-GI 205 Anporretako Bira – Burdinaren Bidea (uztailak 13)
• Udalatx mendiari buelta (uztailak 20)
• Arrasate-Urkiola (uztailak 27)
• Bedoña-Larriño (abuztuak 10)
• Udala auzoa - Gongetako meatzea (abuztuak 24)
• GR-289 Hartzaren Urratsa (irailak 14), azken hau zailtasun handiko ibilbidea
• Arrasate-Arantzazu erromes bidea (irailak 21).

Izen-emateak: izenemateak.arrasate.eus edo 943 25 20 00 / 619 48 57 67 telefonoetan.

Bisita historiko-kulturalak eta ibilbide birtualak

Interesdunek aukera dute patrimonio industriala eta historikoa ezagutzeko bisita presentzialen zein birtualen bidez. Horretarako, https://360.arrasate.eus/ plataformak esperientzia murgiltzailea eskaintzen du.

Jaiak, azokak eta bestelako ekintzak

Herriko auzoetan ospatuko diren jai herrikoiak ere protagonista izango dira uda honetan:

• Zarugalde, Ferrerias, Maala, Udala, Garagartza eta Uribarri auzoetan ospakizunak izango dira uztailaren amaieratik irailera arte.
• Gainera, musika eta gastronomia uztartzen dituzten ekitaldiak ere izango dira, hala nola "Arrasate Blues" jaialdia (uztailak 10, 11, 12, 13, 17, 19 eta 24), eta bertako produktuen azoka (uztailaren 19an eta irailaren 20an).

 Informazio gehiago eta egitarau osoa:
www.arrasate.eus edo  943 25 20 00 | 619 48 57 67