Ekin Emakumeak elkartearekin batera hainbat programa martxan

2019/10/03
Harrera Zerbitzua, Auzoko Programa eta Irakurketa saioak urritik aurrera eskainiko dira berriz ere

Harrera zerbitzua herriko zerbitzuen informazio gunea da, zalantzak argitzeko eta tramiteekin laguntzeko eratuta; udal zerbitzuen informazioaz gain, beste entitate eta zerbitzuetara bideratze lanak ere egiten dira bertan.

Auzoko, euskara, aniztasuna eta herritarrak barnebiltzen dituen egitasmoa da. Aniztasuna du oinarri, Euskal Herrian eta Arrasaten dagoen errealitateaz jabetuz, herritarren arteko elkar ezagutzarako une, gune eta aukerak sortuz. Aniztasuna aitortuz, euskara komunikazio eta kohesio hizkuntza gisa erabiltzeko proposamena, praktikara eramaten duen egitasmoa da, alegia.

Herritar orok hartu dezake parte bertan, euskaraz dakienak auzotar moduan eta ez dakienak auzokide gisa. Bigarren hauek hizkuntzarako ibilibidea lehenengoen eskutik egitean dago gakoa.

Bestalde, Euskaratik urrun dauden herritarrak euskaraz irakurtzera ohitzeko, ipuin motzen irakurketa saioak antolatu ditugu ikasturte honetarako. Irakurketaren bidez euskara ikas daitekeela uste dugu, hiztegia ikasi, ahoskera, ulermena edo, aldi berean, irakurketa moduko gaitasunak landuz. Gainera, euskaratik urrun dauden gurasoei, irakurketaren bidez, modu natural batean, beraien seme-alabekin euskaraz komunikatzeko, partekatzeko eta erlazionatzeko aukera zabaltzen zaie eta hau balio erantsi modura ulertzen dugu.

Saioak urrian hasiko dira, beraz, informazio gehiago eta zehatzagoa nahi izanez gero hurbildu zaitez Ekin Emakumeak Elkartera ( Pablo Uranga 4, behea ) edo deitu  943 79 83 70/ 651 70 79 36 zenbakietara.