Haur eta nerabeen ongizate emozionala hobetzeko ekintza plana osatzen ari da Udala, hainbat eragilerekin elkarlanean
2026/04/29
Arrasateko Udalak, herriko haur eta nerabeen bizi-kalitatearekin eta osasun mentalarekin duen konpromisoan berretsiz, ongizate emozionalean eragiteko estrategia berria lantzen ari da. Ekimena herrian egindako diagnostiko sakon baten ondorioetatik jaio da, haur eta nerabeen egungo beharrei erantzun eraginkorra emateko asmoz.
Estrategia hau bost helburu nagusitan egituratutako ekintza-plan baten bidez gauzatuko da:
- Prebentzioa sustatzea: Arrisku egoerak gertatu aurretik esku hartzeko baliabideak indartuz.
- Detekzioa eta esku-hartze goiztiarra bermatzea: Arazoak lehen faseetan identifikatzeko sistemak hobetuz.
- Esku-hartze zuzena eta eraginkorra egitea: Beharra duten haur eta nerabeei erantzun kualifikatua eskainiz.
- Gobernantza partekatua eta sare-lana indartzea: Eragile guztien arteko koordinazioa bultzatuz.
- Lege-esparruaren garapena eta eguneratzea: Egungo legedia errealitate berrira egokituz.
Lankidetza eta komunitatea ardatz
Proiektu honen indargunea elkarlanean datza. Planaren garapenean eta egikaritzean Udaleko sail ezberdinetako arduradun teknikoak ari dira lanean, horretarako Mahai Teknikoa osatu dute. Horrez gain, Arrasateko eragile eta erakundeek osatutako Komunitate Hausnargunea funtsezkoa izaten ari da, haur eta nerabeekin egunerokoan lan egiten duten profesionalen esperientzia eta ikuspegia txertatzeko.
Udaletik azpimarratu dute estrategia hau ez dela asmo huts bat, baizik eta herriko haur eta nerabeek ingurune osasuntsu eta babestu batean hazteko eskubidea bermatzeko bide-orri zehatz eta sendo bat.