Hizkuntza Eskola Arrasatera ekartzea lortu du Udalak

Irailetik aurrera Eibarko Hizkuntza Eskolako gela desplazatuak Arrasateko Helduen Hezkuntza Eraikinean (EPA-n) kokatuko dira eta ingelesa eta alemana ikasteko aukera egongo da bertan.

Orain arte ez da egon Arrasaten hizkuntza ezberdinak ikasteko Eskola Ofizialik eta ondorioz, arrasatearrak kanpora irten edota eskola partikularretara jo behar izan dute zerbitzu hori jaso ahal izateko.

Bide horretan, Eusko Jaurlaritzako Hizkuntza Sailarekin elkartu eta adostu  ostean, datorren ikasturteari begira Eibarko Hizkuntza Eskolako gela desplazatuak Arrasatera ekartzea lortu du Arrasateko Udalak eta zehazki HHEko eraikinean (EPA-n) kokatuko ditu. Aipatu beharra dago 2008 geroztik Goieskolak egindako lana Hizkuntza Eskola Arrasatera ekartzeko, Udalak, lan hori txalotu eta eskerrak eman nahi dizkio Goieskolari.

Modu honetara, irailetik aurrera ingelesa eta alemana Arrasaten bertan ikasteko aukera egongo da. “Aurrera pauso honekin Udalaren nahia izan da hizkuntzak ikasteko aukera Arrasate zein inguruko herrietako biztanleei hurbiltzea eta horretarako ahalik eta erraztasun gehien ematea”, azaldu dute Udaletik.  

Ildo horretan gaur goizean bertan izan dira Arrasaten Eusko Jaurlaritzako eta Eibarko Hizkuntza Eskolako ordezkariak eta alkatearekin batera, aipatu instalazioak bisitatu dituzte. Alkateak adierazi duenaren arabera, lehen bi urteetan Helduen Hezkuntzako eraikina izango da Arrasateko Hizkuntza Eskolaren egoitza eta etorkizunera begira, Udal Euskaltegiko instalazioak Arimazuri plazan aipatu du kokagune posible gisa “noski, behin instalazioak konpondu eta bertako erabiltzaileak Kulturola eraikinera aldatu ondoren (erlojuaren eraikina)”.

Amaitzeko, inskripzio epea Ekaina bukaera edo Uztailean irekiko da eta bertan zehaztuko da gela eta ikasle kopurua. Gogorarazi nahi da matrikulazioaren prezioa 72 euro urteko dela eta familia ugariek deskontuak dituztela.