Irailaren 3tik 12ra Kulturate Akustikoa ospatuko da Arrasaten

2021/07/30
Irailaren lehen bi asteburuetan, egubakoitzetik domekara, guztira 6 kontzertu eskainiko dira aipatu zikloan: Copernicus Dreams, Hatxe, Maite Larburu, Eneritz Furyak, Sonlosgrillos eta Buffalo Feat Nacho Soto. Sarrerak kontzertuan bertan eskuratu ahal izango dira.

Dagoeneko uda sasoian bete-betean murgilduta gauden honetan, Arrasateko Udalak 'XIII. Kulturate Akustikoa' programa gehitu dio udako kultura zein turismo eskaintzari.

Musika ziklo hori irailaren 3tik 12ra bitartean ospatuko da, eta guztira 6 artista eta talde batuko ditu. Kontzertuak hilaren lehen bi asteburuetan eskainiko dira, egubakoitzean, zapatuan eta domekan, eta sarrerak kontzertuan bertan eskuratu ahal izango dira.

Kontzertuak, halaber, Kulturateko Areto Nagusian egingo dira, guztiak 20:00etan, eta urte barruan antolatzen diren gainerako musika zein kultura egitarauek bezala, helburu dute herriko kultura eskaintza zabaltzea eta kultura bera sustatzea, bereziki une gogor hauetan, kultura eragileen lana balioan jarriz eta indartuz.

Era berean, Kulturate Akustiko musika zikloak, uda agurtzeko aukera paregabea eskainiko die ikusleei. Ondorengoak dira XIII. edizio honetan Arrasaten izango diren artista eta talde gonbidatuak:

  1. Irailaren 3an, egubakoitza: Copernicus Dreams
  2. Irailaren 4an, zapatua: Hatxe
  3. Irailaren 5ean, domeka: Maite Larburu
  4. Irailaren 10ean, egubakoitza: Eneritz Furyak
  5. Irailaren 11n, zapatua: Sonlosgrillos
  6. Irailaren 12an, domeka: Buffalo feat. Nacho Soto