La Merced ikastetxea kokatutako eraikina jarriko du Arrasatek Hezkuntza Komunitatearen eskura

2020/09/02
Arrasateko Udala HH. Mercedarias de la Caridad mojekin jarri zen harremanetan, La Merced ikastetxea, hala behar balitz, eskola jardunerako erabiltzeko baimena eskatzeko. Udalaren ustez eraikin hori da eskola-beharrei egokien moldatzen dena.

Eskola-ikasturtea hastear da, aurten Covid-19ak eragindako egoerara egokituz. Era mailakatuan egingo da itzulera: datorren irailaren 7tik aurrera hasiko dira Haur Hezkuntza eta Lehen Hezkuntzako haurrak eta DBHko 1. eta 2. mailak; irailak 15ean, berriz, DBHko 3. eta 4. mailak eta Batxilergoa.

Bide horretan, ikasturtea normaltasun-berrian segurtasun baldintza oro betez abiarazi dadin, EUDEL Euskal Udalen Elkarteak lankidetza eskaera luzatu zien Udalei haur eta nerabeen eskolatze presentziala bermatuko duten udal-espazio publikoak identifikatzeko, ikasleak birkokatu behar diren kasuetan, osasun-baldintzak edo eskatutako baldintzak betetzeko.

Eskaera horren aurrean, Arrasateko Udalak egoera aztertu, eta HH. Mercedarias de la Caridad mojekin jarri zen harremanetan, La Merced ikastetxea kokatu zen eraikina, hala behar balitz, erabiltzeko baimena eskatzeko. Udalaren ustez eraikin hori da eskola-beharrei egokien moldatzen dena. Mojek baiezkoa erantzun diote Udalaren eskaerari, eta hortaz, Arrasatek, eskola-ikasturtea normaltasun berrian garatu ahal izateko La Merced eraikina izango du eskura, beharrezkoa izango balitz erabili ahal izateko.

Udalak HH. Mercedarias de la Caridad mojei eskertu nahi die adierazitako prestutasuna.

Eskolaratzea segurtasun berme guztiekin gauzatu dadin, Eusko Jaurlaritzako Hezkuntza eta Osasun Sailek zehaztutako gomendioak jarraitzeko deia luzatzen die Udalak herritar guztiei.