Arrasateko Udalak, Santa Marinako auzokideekin eta elkarteekin, Santa Teresa eta San Esteban kaleak birmoldatzeko proiektua garatzen jarraitzen du

2022/05/25
Helburu horrekin, datozen asteetan iritzi azterketa bat egingo da, bizilagunei telefonoz egindako inkesten bidez, eta gizarte eragile nagusiekin elkarrizketa saioak egingo dira.

Arrasateko Udalak hiri berrikuntzako prozesu bati ekingo dio datozen hilabeteetan Santa Marina auzoko Santa Teresa eta San Esteban kaleek mugatutako eremuan. Proiektuaren helburua da irisgarritasunaren, zoladuraren, hiri altzarien, argiztapenaren, ekipamenduen eta abarren arloko gabeziei erantzutea.

Horretarako, udalak, berrikuntzaren diseinu fasean dagoela, kontsulta prozesu bat egingo du, auzoan bizi diren pertsonek zer iritzi duten eta herritarrek zer eskatzen duten jakiteko. Helburua da partaidetzako prozesu baterako esparru orokor bat zehaztea, gizarte eragileentzat irekia, auzoa berrurbanizatzeko proposamenak zehaztuko dituena.

Helburu horrekin, datozen asteetan iritzi azterketa bat egingo da, bizilagunei telefonoz egindako inkesten bidez, eta elkarrizketa sakonak egingo zaizkie gizarte eragile nagusiei, eskaera orokorren berri eta izaera espezializatuagoa eta sektorialagoa duten eskaeren berri jakiteko eta horiek guztiak bereizteko.

Maria Ubarretxena alkateak adierazi duenez, “herritarrei ahotsa ematen jarraitu nahi dugu, gure udalerriaren etorkizuna elkarlanean eraikitzen jarraitzeko. Helburua da telefono bidezko inkesten eta sakoneko elkarrizketen bidez eremuan dauden 400 etxebizitza ingurura iristea, azterketan pisu eta ordezkagarritasun handiena duten gizarte eragileen iritzia txertatzeko, izaera orokorreko eskaerak sektorekako eskaerekin osatuz. Bilerak aurreikusten dira Avesantesekin, auzoko auzo-elkartearekin, auzo-batzarrarekin eta auzo-alkatearekin, Tokiargi erretiratuen elkartearekin, administratzaile eta komunitateko presidenteekin, Arizmedi Ikastolarekin eta merkatariekin, beste hainbaten artean”.

Inkesten emaitzak eta gizarte eragileekin egindako elkarrizketak dira partaidetzako esparru orokorra ezartzeko eta auzoan hautemandako gabeziak, herritarren eskaeren esparrua eta akordio-esparru orokor bat sortzeko oinarria.

Partaidetzako prozesua Deitel Direct SL enpresarekin batera egingo da, eta aurrekontua da 14.650+BEZa. Prozesuak 4 hilabete inguru iraungo du eta ekaineko lehen astean hasiko da.