Udalako Ingurumen Eskolan egon dira Mondra futbol taldeko udako campuseko parte-hartzaileak

2020/07/23
Kirola eta natura uztartzeko elkarlan honi esker haurrek Arrasateko naturaz gozatzeko aukera izan dute.

Uztaila hasieran, adin-tarte desberdinetako hiru taldek goiz pasa egin dute gurekin batera. Erguin aldean elkartu gara taldeekin eta oinez ekin diogu Udalarako bideari. Ibilbide hori baliatu dugu, Arrasatek dituen hainbat baliabide natural umeei erakusteko, tartean, altxorra den abarizti txikia. Horretaz gain, Udalatx inguruan hain ugariak diren kobazuloak eta bestetako modelatu karstikoak ikusteko aukera ere izan dugu. Baina, dena ez da ibiltzea izan, umeek jolasteko aukera ere izan dute eta horretarako, basoan aurki daitezkeen elementuak erabili ditugu.

Udalara heldu eta atseden txikia egin ostean, umeek orientatzeko daukaten gaitasuna frogatu dugu. Izan ere, orientazio jolas bat egin dugu, inguruneko txoko desberdinak ezagutzeko.